01 November 2010

Muthilh theih loh manah

Ka mut reng a chhuak thei lo tun zan chu. Khawvel a ka thil nin ber chu muhil si lova khum a mut hi. Chuvang chuan harh kur a khum a mut reng ai cancer ah bawk lut leh lawk teng!

Hetia cancer patient lo nih ve tak a thil pakhat ka notice - mi tinreng mai hian testimony ropui tak nei nghal thuai turah min ngai titih tlat mai hi :) Mahse cancer vei pawh ni ila, mihring ka la ni si a, thlemna lak a a ngai te a chak lo, duh leh it ngai te te, mi ngei ngai te te a ngei a, chak lohna ngai te te la nei vek ka ni si.Thil danglam awm chhun chu a hma a cancer vei lo misual kha tunah erawh chuan cancer vei misual ka lo ni ta a a ni deuh mai :-)

Min an treat dan ah erawh thung hi chuan Paula eng in a chhun thluk tawp ang mai hian an treat emaw chu ka ti deuh :) "Kha le Cancer!" an tia an rawn theh thruai a, eng a chhun thluk ang maiin min rawn vawm thlu a, tichuan vawi leh khat ah ropui tak a Lalpa tan a hna thawk nghal tur ang deuh ani in ka hria min beisei na chu. Midang cancer vei ho te pawh heti hian an lo beisei ve thin awm sia ka tia ka khawngaih ta rum rum mai.

Kei lah chu cancer leh thih hlauh vang ngawt a uchuak tak a Pathian han koh vel hi ka lai tlat mai anih chu! A dik kher lo ang mahse, ka cancer miah loh leh dam that var pawh a ka tih ngei loh tur chu thih hlauh vang mai a ti ka nih chuan Pathian pawhin A duh ka ring lo deuh tlat lehnghal nen...

Pathian ngaih thu bikah, kei hi chu misual, Lalpa lak ata hla tak tak vah bosan reng ching ka nih avang hian cancer hma daih tawh atangin nun khawro avangin zanah ka harh a ka Pathian hi ka ngai thin. Tunah ka cancer hnu ah pawh a dang chuang lo. Dawt sawi loh chuan cancer vang a ka ngaihzual em em tak ka hre lo. Misual Pathian hlat avang a Pathian ngai thin kha, tunah pawh misual cancer vei Pathian hlat avang a Pathian ngai thin ka ni leh mai.

Mahse cancer thu ah chuan he cancer hi purpose neiin Lalpa hian a rawn thlentir tih ka ring nghet thlap a. Chuvang chuan zawhna leh hriatthiam duh ka ngah lutuk. Khang a ka zanlai a Pathian ka hlatzia ka hriatchian thut a, Lalpa hma ah ka mangangin "Lalpa, ka hnaih theih na che anih dawn chuan ka nun ah pawh hreawmna emaw harsatna emaw pawh min pe mai rawh" ti a ka dil thin na kha a rawn chhanna a ni berin ka hria.

"Harsatna min rawn pe rawh" tiin ka dil apiang hian, ka sawi zawh rual rual hian ka hlauthawng leh ziah thin a, thil rapthlak lutuk hi A rawn thlentir mai ang tih hi ka hlau leh thin. "Lalpa harsatna min rawn pek chuan thil hreawm nasa lutuk chu theih hram chuan ni lo se, ka tawrh theih loh tur chu min pe suh" hi ka ti leh zung zung thin.

Cancer a rual a pahnih min rawn pe ta hi, khatia ka dil lai kha chuan hetiang a ni dawn tih hria ila hlau in ka khur ang. Mahse ka lo hre lawk lo hlauh a, Aman ka tawngtai chhang a min rawn pek si chuan ka tawrh theih tur A ti tihna ani mai a. Chuan ka tawrh theih na turin hlauh lohna te, ka fight na tur a ka mamawh tinreng A rawn chhawp ready nghal vek bawk a. Hemi thu ah hi chuan ka tawngtai chhan na famkim ani a, vuina pakhat mah ka nei rih lo. (Future chu ka sawi thei lo :))

Mahse chu sawi tawh angin, thlarau a khat tak vek emaw tih vel chu a hnai lo nasa. Mi re re hian Pathian in ka chung a thlentir nachhan te, Pathian in ti tur a min duh te, Pathian hnen a ka tawngtai dan tur, ka sawi tur leh dil tur te pawh an chiang em em vek a. Kei a cancer ber a hian a engmah hi chian ka nei si lo.

A chang chuan mihring bula ka rilru a questions te, ka hlauhthawn leh ka rinhlelh te sawi ka ning thin. Cancer vei miah lo leh la tuar ngai miah lo in cancer thu ah min han sermon khum hrep mai chuan an thusawi te hi eng ang pawhin dik se, a dik tih pawh hria ila, min hmangaih vang ani tih hriat pawhin, kei misual rilru ah chuan a tla na har leh tlat thin.

Vawiin zan ka muhil thei lo pawh khumah ka inngaihtuah a, Pathian ka ngai a, ka hlau bawk a, ka mamawh bawk a, ka ning bawk a, a kual nuaih nuaih a. Han titi thawven ka chak a, mahse zan rei tawh nen titi pui tur an awm loh bakah tunge titi pui ka duh ka hre lo a. Pastor fel deuh awm se, zawhna ka va han ngah tak ka tih rilruk laiin, Isuan "Engatinge midang I zawn I zawn? Kei titi pui tur ka awm reng a" a rawn ti a.

Ka rilru a ka vei zual te chu ka hrilh a ka thaw chu a veng deuh. Tawngtai chuan "Aw Lalpa.." kan ti dek dek a, sawi tur hi ka hre lo ka buai vek thin. Mahse vawiin zan chu ka tawngtai lova kan titi a ka sawi ve teuh mai ka tawngtaina a ka sawi ngai loh thlengin thlengin.

Mahsee ka Lalpa lah hi A tawng zawi thin si, A tawng tlem thin bawk si, thawm dang ri min tibuaitu a tam si ka duh ang hian A aw ka hrechiang thei thin lo. Hriatthiam theihna te hi school a lehkha kan zir ang khan lehkhabu min rawn pe se, note te min ziah sak a kan lo by heart a kan hrethiam ta mai thin ang kha nise, lehkha ka zir nasa viau ang te ka tia. "Lalpa enge ti tur a min duh?" tih hi ka zawhna lian ber ani. School ang te nise teacher te khan a answer ready in min han pe leh ang a, kan han by heart leh mai tur!

Mahse chupawh chu Isuan min hau leh deuh titih in ka hria, "Engkim hi hriatthiam nghal vek tum tut tut suh" a tiin ka hria. "Anih ka buai lo ang a, mahse nitin ka rawn zawt ziah ang che" ka ti a. Mahse chupawh chu kei michak lo lutuk hi ka inring zo leh lo a, "Ka rawn zawh theihnghilh che chuan min lo remind thin rawh" ka ti leh hram :)

Pathian lakah chhe te tal pawh chhuan tur ka va han nei lo tak! Chu question pakhat nitin zawt tur pawh a inrinna nei zo lo khawp a mi nghet lo ka ni. Ka inkhawngaih letling tawh :) Mahse hei pawh hi ka lawmna tizual tu a nih na a awm - heti khawp a chhuan tur nei miahh si lo hi malsawmna hian he ka nun hi A va han vur nasa si tak! A mak ee chhuan tur nei miah si lo heti zozai lawmthu sawi na tur thil min pe phal si hi...

Aaa a tam lutuk ka rilru a thil awm hi ka tlaivar hma in mu daih ang dar 4 a ri tawh. Tihian zan rei ah hi chuan engkim a reh a, a dam duai a. Mahse zing a lo ni ang a thlemna chitin rengin min rawn tibuai leh ang a, ka va han peih lo tak!


17 comments:

Sekibuhchhuak said...

Hotunu, Mizo tawnga thu ziah pawh i thiam hle tho mai. I riru tak i ziak ani bawk a, angaihnawm dan a ngaihnawm bik.

Ka pa hian hrawkna hia nei a, kar hmasa chho khana zual a, mi zawng zawngin hrawk cancer a nih an ring vek a. Cancer bawihsawmin an bawihsawm nghal pek a,a hriat apiangin an rawn kan a.Ani pawh a zam deuhva. An scan result a chhuak a, cancer chua n hmu lem lova.

Ka ngaihtuah ta a, cancer hi kan tih mah mah em aw ? Nang hi chuan a eng lam in i la thlir zel thei a. I fak awm ngawt mai. I that chho zel pawh ka ring tlat.Ka pa, cancer nia in ring kha a zam em em mai si a.

Isua, titi pui tihlai tak khi a pawimawh khawp mai. Pathain hi, hmun sang deuhva awm a, hla deuh anga ngaih hi thil awl tak a ni. Mahse, i sawi ang khian kan titi pui melh melh theih, kan duh duh kan sawi pui theih Pathian, kan Thian ani si a.

Harsatna karah pawh chhelh tak leh Pathian thiltum te i hmuh chhuah zel theih nan kan lo tawngtaipui zel ang che.

Mama said...

Tun tum i post chu ka lo chhiar chhuak vei dap a, ngaihsak i mamawh tih a lang. Isua nen titi theia i insawi laiin a tawpna hian min chhun tlat, 'ka va han peih lo tak' tih hi. Thil zawng zawng reh ruih nia i hriat laiin Isua i kawm thei a, ni eng leh khawvel thawm a lo awm leh hunah chuan 'peih lo takin' hun hman i tum leh si. Zana i kawm Isua kha khaw engah pawh a kawm theih reng. Khawvel thawm bengchheng karah pawh Ani chuan i tawngtaina zawite pawh a hre thei a sin. Khawvel thawm ai chuan keimahni nun hi Isua hmaah a bengchhang zawk fo ang.

'Amah ngei hi a ni mahni chauh pawha him taka mi awmtirtu' an lo tih khan an ngaihruatna an phuh chhuak satliah a ni miah lo. A taka an hman avangin an phuah chhuak a ni zawk. Chu chuan nang pawh a awmtir thei che tih ka chiang hle. Zaninah i tan ka tawngtai dawn.

Cancer nih vanga Pathian khawngaihna beiseitu emaw, natna eng emaw avanga beiseitu chuan Pathian hmangaih aiin amah leh amah a inhmangaih a ni ang. Pathian hmangaihna ropuizia hria a chhang lettu chuan cancer chung pawha lawmna, thihna hlim kawr ruamah pawh engmah hlau lova awm theihna. Ka sermon vak dawn emaw ni chu le!!

Jerusha said...

Seki - zanlai distraction awm lo ah hi chuan tawng teuh theih zel mai :) I pa chu a cancer lo chu ka lawmpui khawp mai che. Min lo tawngtai pui na zawng zawng ah ka lawm, ka mamawh bawk a min lo tawngtaipui zel ang che. I pa pawh lo dam zel rawh se.

Jerusha said...

Mama - I sawi chu a dik khawp mai. Nia in eng that tur awm reng ka nia min rawn hrilh zel rawh. Mahse ka sawi chian duh pahnih khat - 1. Peih loh thu - vawikhat Isua nen kan inpawl vang a peih loh te, hreh nei rengt reng lo a nung tur ni ila a awl viau ang mahse hei hi a niin ka hre lo. Ka sawi ang khi, mi chak lo tan leh phei chuan, nitin, every minute a fight ngai hahthlak thei ve fu ani. Hreawm chang leh nawm chang awm turah ka ngai.

Tin Isua titi pui tih thu ah pawh, ka sawi ang chiah khi a ni mai. Thlarau a khatliam avang a 'titi' pui ka ni lo, ka nun khawro vang tawngtai te a khirh ulh vang a 'titi' ka ni. Harsa taka zan khat ka titi pui vang in a tuk thil thleng tur Zawng zawng ka hlau lo nghal thei lo kei chuan.

duhawma said...

Kan hriatthiam loh zawng zawng te hi engtik niah emaw chuan VANRAM ah khian kan LAL ISUAN min la hrilhfiah vek dawn a ni.
Ni e, Nun hi hriatthiam a har a, PATHIAN kan hnaih theihna tura harsatna thleng se kan ti pawhin kan rilru tak tak chuan thleng leh lo maise kan ti leh thin. Mahse kan Pathian hi 'roreltu dik' a ni a, kan chunga a thlentir te, thlemna a ni emaw, harsatna a ni emaw kan hlawkna tur a ni tih hriatthiam hi a va pawimawh em! (Kei ngei pawh hian a chang chuan ka ringhlel fo, rawngbawltu ni chung si hian).
I kawng zawh zawng zawng hi ISUAN a zawhpui che tih loin hre nawn leh ang che.

Anonymous said...

Sawipui tur che ka ngah hle mai. trawngkam ka thiam lo em a...question ka neih apianga ka en ve ziah ( apart from Bible) hi lo en ve rawh. Topics an khel kim khawp mai.

http://www.billygraham.org/spiritualgrowth_topics.asp

May the (Holy) force be with you :-)

-bmw

Mizohican said...

Va ziak tha dup dup ve dear Jer. Han belh ve mai tur ka rawn ziak chhuak thei chiah lova, mahse ka sawi tum chu i hre awm e. Kan tawngtaina ah i awm zel a nia. Never give up and hugz.

dr_feelgood said...

Lawmna tur engmah awm si lova lawm em em tho hi Pathian atang a lo chhuak a ni tih i lo hre dawn nia.

Anonymous said...

'My grace is enough for you' Kan Lal Isuan a ti miau si a, sawi leh chuan tur a vang ti raw.... A NI berin ENOUGH a tih si chuan......

Zara Ralte said...

Boss, i thuziak hi a 'flow' a dik ka ti chhiar a nuam thin. Muhil thei lova mutsual hi kei pawh ka nin ber thil a ni. Hmanni Biak In thar a inkhawm ni khan thildang buaipui angai a i damlo kan loh bakah ka be hman ta lo che u a, Pathianni hmasa lah khan ban rual a hmanhmawh tawk a i gate lam a i kal lai ka rawn hmu hman tawk che a...ka inthiam lo khawp mai. Han dam deuh la campus lamah shooting rawn nei teh u Sawmtea ban awrh lai ngei hian!

Boss, i thuziak a Isuan "Engatinge midang I zawn I zawn? Kei titi pui tur ka awm reng a" a rawn ti a tih lai tak hi ava tha em, ka duh e.

caribou said...

Jerusha, i natna avangin ka khawngaih khawp che a, cancer i vei chung pawha thu tha tak tak i la rawn ziak thei hi fak i phu khawp mai. Pathianin atangin taksa damna chang thei la ka ti khawp mai. Pathhianin awmpui zel che rawh se.

Vulmawi said...

Ropui hle mai, ngaihnawm bawk si, inzirna tur tam tak a awm tlat...

Xauz said...

A tha hle mai. Keipawh ka hriatchhuah thar deuh chu, kan lawm vang pawh ni miah lo, kan hlim leh tui vang pawh ni miah lo hian Amah hi han fak chiam ila, lawmthu hi han sawi mawlh mawlh ila, kan lo lawm chawp zel thei mai. Lalpa'n awmpui zel che rawh se.

Raldawna said...

Chhiar a manhla hle mai. Kei poh ka pa zarah Tata Memorial Hospital, Mumbai te ka lo zuk dai ve tawh a. Mizo cancer vei tam zawk hi chu an 'sombre' ruih mai a. Thihni nghakin sana an en ni berin a lang. Thih hlauh vanga Pathian hnaih i tih lai hi a awm thei ang.

Mahse, i Pathian pawl dan hi ngaihnawm ka va ti em. Harsatna neih lai chauha Amah pawl, mamawh loh huna theihnghilh leh thin zingah ka tel ve. Ka dilna min chhan sak pawhin ka'n tal hrang leh thin...Aaaa..Mihring zia a ni e.

Lo ziak zel teh. Tiang hi mitin tan chaw a ni e. Chicken soup for the *** ai chuan Mizo bai ngei hian hrawk a fah zawk e.

MRalte said...

Hei lo liama Sermon!!! Pulpita dinpuina tham a ni. Miin tha an ti angem tih aia ka rilrua awm ka share chiah hi Pathianin mal a sawm a, a nung bawk. Cancer hi thihna a ni kher lo. Kan kawt maia hmakhawsanga lungtum let reng pawh a duh chuan ka nunna lakna hmanruaah a hmang thei. Tuite in dai kai lai pawn a chimpil lovang, Hlau suh... Pathian hian Bible ah amah ringtute hnenah hian vawi engzat nge HLAU SUH tih tawngkam hi a hman le?? Tin, Thlarau mi tih pawh hi so buah buah rik buah buah tih bual bual lam a ni lo. I thu ziah hi thlarauva khat thuziak a ni. Thlarau rah nun chu Galatia-ah a in ziakin ka hria.
Ka ti lehpek thin ang HEI LO LIAMA SERMON ROPUI hi Pulpit-ah pawh ka la ngaithla ngai lo.

Babie Lalremruati said...

Jerusha, ka rilru a hneh lutuk. Ka Lalpa hi a tawng zawi si...i tih lai te hi ka duh a, eng vang tak nge poh ka hriat loh in ka tah te a chhuak tun mai.
Take gud care. NCC camp lai ni se, zankhua a i titi ngaihthlak ka van chak leh toh em!!!!

gucci handbags said...

I promise a desire to hope that the friends of mine are happy have not put like oneself happiness with coming the warm Christmas to like in every year's this time sending to my blessing Merry Christmas