Thil eng eng emaw sawi mai mai teh ang

Promotion ka hmu ve leh ta! He company a kum 4 leh a chanve vel ka thawh chhung a ka promotion hmuh vawi 4 na ani ta.

Tunah chuan corporate world ah kum 7 dawn ka lo awm ve tawh der mai. Kum 7 hi naupan lai khan an rei tehreng nen tunah chuan a tawi ta hle mai! Hriat loh hlan in a lo zo duak mai a, ngaihtuah a ti thui khawp mai. Ka hna thawh kual tawh zawng zawng te kan ngaihtuah hian ka lung te a leng rum rum...

Ka hna mumal thawh hmasak ber chu Food & Civil supply office ah peon hna kha a nia :-) Matric ka exam zawh result ka nghah laiin mi ai ka kal a. Private school ho ah ka thawk kual nasa tawh bawk. Chaltlang veng nula leh tlangval tunah chuan nu leh pa ni tawh te khi ka tuition pek tawh an tam hle bawk. A va senior theih em! :P

Delhi hna zawn lai te kha! Min reject nasa thei si, bei kha a dawng nasa thin ania aww...Unaunu Biteii hi vawikhat chu interview turin khawi office ah emawni an ko a, a rawn haw leh a sawi ka la hriat reng chu "Bathroom ah zung turin ka va kal a, bathroom silfai tu nu hi a lo ding a. Khanu lo ding te kha ka ngaihtuah a, ani hi chuan hna a nei bik ka ti a, ka awt ngawih ngawih khanu kha" a ti. Hna neih loh kha a hlauhawm em ani.

Google a ka thawh hma khan IBM Daksh ah khan kum 2 ka thawk a, Rs 8000 vel ka hlawh a. Kha kum 2 chhung khan promotion vawi khat mah min pe lo. Performance that lawmman chu ka dawng ka dawng a, mahse promotion hun chuan an cousin te, an brother-in-law te an promote zel. Ka ban dawn a ka resignation letter ka submit ni in kan Operations Manager in a room ah min ko lut a, ka promotion letter min han hmuh vel anih kha. An style kha lo uih ngawt mai!

Tuna ka thawhna company hi ka join lo teuh em em khawp a. Ka join nachhan ber chu dik tak chuan thlawhna ka chuan chak vang ani ta ber :)

A tir interview kha ka thianpa interview tur amah a kal hreh min kalpui rawh a tih avangin ka va kalpui a. Test te ka pass leh telephone interview te ka tlang ve zel hnu chuan Hyderabad a insawn ka duh dawn chuan loh avangin an HR ho bulah join ka tum loh thu ka hrilh ta a. Mahse "Kan hmu duh che a, Hyderabad ah I lo zin thei ang em thlawhna ticket kan rawn thawn ang che anga?" an ti chiah mai chu, ka aw rang khawp mai.

Tichuan unaunu Biteii'n thlawhna chuan dan tur zawng zawng te min zirtir a, airport chhung pawh vawikhat mah ka la hmuh ngai loh avangin ka hlau vel vek sia. Mahse keimah chuan Delhi airport atang chuan ka thlawk chhuak ve ta ngei a. Hyderabad airport kan thleng chu, driver form nalh tawkin sign lian takin 'Miss Jerusha, Google' tih a lo keng ka va hmu chu, ka boruak hip changkang vel ta lutuk ka inhmeh loh lutuk avangin ka kal te pawh a buai vek hialin ka hria. Car nalh tawk in office ah min hruai a, ka haw lehna tur ticket nen ka driver chuan airport ah zanah min thlah leh thlap bawk a.

Hemi zawh hi chuan ka ngaisang tawh lutuk a ka interview last na tur Google India Director, sap pa lehngal in phone a min rawn interview tur chu ka tlin loh ka hlau nasa tawh. Sap la be ngai lo tih takah sap anih na ringawt te khan min va ti huphurh zual tak! Chutih lai a Director chu

hepa hi ani a, a lo chhe lo reuh em em mai lehnghal a, laihna tizual turin :P

Mahse Pathian zarah ani hian ka tawng buai lutuk te chu min khawngaih nge pawh ka hre lo, min tlin tir ve ta mai a. Ka thawh hnu ah phei chuan kan inti tha ta zek a. Tunah chuan Google pumpui ah User Ops ah Director a ni tawh. Tunthleng hian India a a rawn zin chang pawhin ka hmingin min la ko thei. Mi lal deuh ka nih hunah chuan a ni ang chiah nih hi ka duh.

Heta ka thawh chin hi chu ka hlim ta em em tlangpui :) Ka beisei phak ngai lohin, ka passport ah te stamp pakhat mai pawh ni lo engemaw zah te a awm ve ta thliah a. Thlawhna la chuang ngai miah lo kha, keimah te in sap ramah te hlau miah lo in ka zin kual ka zin kual ve a. India ram ah leh phei chuan 'Ka van chuang peih lo tak' te kan han ti vel a. Ka rilru ah hetia thlawhna chuan ka nin apiang hian ka chuan chak theih zia ka ngaihtuah chhuak a, Pathian ka zah thin. Chhungte awh ang te, duh ang te han leisak ve theih hi te hi ka inring pha ngai lo.

Kum 4 leh thla 7 chhung a promotion vawi 4 hmuh hi thil awl ai a ni lo bawk a, mi zawng zawng hmuh mai mai loh thil ani.

Heng zawng zawng hi Pathian min pek ani tih hi ka hria. Mahse ka tlin loh na ka in en hian, a nasa lutuk a, ka thil sual tih zawng zawng te, Pathian hian engatinge malsawmna hian min la vur reng le ka ti a, Pathian ka zah a, ka phu loh malsawmna min pek zawng zawng te hi ka ngaihtuah chian chuan ka zak thin a. Mahse thil dang zawng ai chuan, engvangin nge heng malsawmna hi min pek duh le tih hi ka zawhna tam ber ani.

Mahse chung zawng zawng a chhanna ka hmuh chu, sualin phu thlawt lo mah ila, Kraws thihna avangin Pathian mit ah chuan ka hlu in ka lo la mawi ve ngei ani! A mit ah ka hlut miau avangin heng malsawmna te hi ka tan Lalpa hian a lo la phal a ni.

Danglamna a awm lo ve

Kraws thisen hlu ah chuan

Kan mawhphurhna thai bo an ni

Chu chu ka hlutna

Chutah chuan ka mawi ani

Keizawng hlutna ka nei lo

Keizawng mawina ka nei lo

Mahse Kraws thihna avangin

Ka hluin ka mawi a ni.